Migrant Trail Race 2025

Shtegu i Kaprojve” është një garë që zhvillohet në një nga peisazhet më piktoreske të Shqipërisë, me një ngritje në lartësi prej afërsisht 2045 m. Fillon në qendrën e Bashkisë “Fushë-Arrëz”, kalon përmes fshatit Fushë-Arrës, ndjek shtegun me pisha të dendura drejt malit të Krrabit. Më pas shtegu i gjelbër i çon vrapuesit të kalojnë tangent fshatrat “Micoj” dhe “Lumëardh” drejt Kishës së “Shën Rrokut”, në luginën e bukur të “Prrezit”, stanit të “Nik Zogut”, kreshtës “Laku i Ballshit”, drejt stanit të “Dardhës”, stanit të “Brahajve”, në fshatin “Orosh”, drejt ujëvarës së “Kryeziut”. Një pishinë natyrore rrethuar nga gjelbërimi i dendur, me ujë kristal e të freskët, ku garuesit mund të pushojnë dhe rigjallërohen (ju kujtojmë kujdesin nga uji i ftohtë i ujëvarës) për t’u rikthyer të freskët në shtegun me pemishte e fruta të stinës drejt fshatit “Kryezi”. Më pas shtegu drejtohet drejt Kishës së Shën Rrokut dhe duke ndjekur kreshtën arrin në pikëmbërritjen, në qendër të Bashkisë “Fushë-Arrëz”. Peisazhi kalon nga kodra të valëzuara në lartësi malore, rruga është tërësisht tokësore. Shtegu është pastruar nga bimësia e dendur dhe pengesat e tjera, për ta bërë sa më të përshtatshme për vrapim dhe për të shijuar edhe më mirë bukuritë e zonës. Përgjatë shtegut nuk do të mungojnë burimet me ujë të fresket.